«Հայաստանի մանուկներ» հիմնադրամը Ջերարդ Գաֆէսճեանին շնորհեց «Փրկեք սերունդը 2010» պարգևը

«Հայաստանի մանուկներ» հիմնադրամն իր 2010թ. «Փրկեք սերունդը» պարգևը շնորհեց ձեռներեց և բարերար, Երևանի Գաֆէսճեան արվեստի կենտրոնի հիմնադիր Ջերարդ Գաֆէսճեանին` ի ճանաչում իր ծավալած ազգանվեր գործունեության: 
 
Պարոն Գաֆէսճեանի անունից պարգևը ստացավ Հայաստանում ԱՄՆ նախկին դեսպան և «Հայաստանի մանուկներ» հիմնադրամի տնօրենների խորհրդի անդամ Ջոն Էվանսը: 
«Հայաստանի մանուկներ» հիմնադրամի գալա տոնակատարությանը դեսպան Էվանսը ներկայացրեց պարոն Գաֆէսճեանի կողմից հղված ողջույնի խոսքը, որում բարերարը կոչեց այդ պարգևատրումը «իր կյանքի բարձունքներից մեկը»: 

Պարոն Գաֆէսճեանի կարծիքով, «Հայաստանի մանուկներ» հիմնադրամի առաքելությունը` բարելավել հայերի, հատկապես մանուկների կյանքը Հայաստանում, առաջնային է հայ ժողովրդի կենսունակության համար:
«Հայաստանի մանուկներին պետք է փրկել հենց այն ճանապարհով, որն ընտրել է «Հայաստանի մանուկներ» հիմնադրամը», - ասաց պարոն Գաֆէսճեանը և շեշտեց, որ կարևոր է ստեղծել մի այնպիսի միջավայր, որտեղ երիտասարդները կցանկանան ապագա կառուցել: «Նրանք կցանկանան մնալ այն երկրում, որտեղ գոյություն ունի լավ կրթություն, առողջապահություն, աշխատանքի լավ հնարավորություններ, որտեղ կա օրենքի գերակայություն, հարգանք բնության և հարևանների հանդեպ»:

Պարոն Գաֆէսճեանը կոչ արեց ներկաներին չվատնել գոյություն ունեցող ռեսուրսները, հակառակը` կենտրոնացնել ջանքերը Հայաստանում:  «Որքան ավելին անեք, այնքան ավելի լավ կզգաք ձեզ», - ասաց նա: «Եվ դրանով իսկ կօգնեք ազգին վերջնականապես հաղթանակել Ցեղասպանության դեմ մղվող պայքարում»: 
«Հայաստանի մանուկներ» հիմնադրամը ձեռներեց և գիտնական Գարո Արմենի նախաձեռնությունն է:  2004թ. հիմնադրման պահից կազմակերպության ծրագրերը նպատակաուղղված են  Արմավիրի մարզի տաս գյուղերում կենսամակարդակի բարձրացմանը: Իրականացված ծրագրերի համախառն արժեքը կազմում է շուրջ 10 միլիոն ԱՄՆ դոլար: Ծրագրի շահառուներն են  22,000 մեծահասակներ և երեխաներ: 

1996 թ. West Publishing ընկերությունից հեռանալուց հետո պարոն Գաֆէսճեանը ստեղծեց «Գաֆէսճեան ընտանիք» հիմնադրամը և իրեն նվիրեց հայ ազգին սատարելու գործին` ինչպես Հայաստանում, այնպես էլ Սփյուռքում: «Գաֆէսճեան ընտանիք» հիմնադրամի կողմից ավելի քան 128 միլիոն ԱՄՆ դոլարի ներդրում է կատարվել Հայաստանի տարբեր ձեռնարկություններում: Ստացված հասույթը կրկին ներդրվել է Հայաստանում կամ փոխանցվել ոչ առևտրային ծրագրերի օգտին: 

2004 և 2006 թթ. «Գաֆէսճեան ընտանիք»  հիմնադրամը «Հայաստանի մանուկներ» հիմնադրամին է փոխանցել 35,000 ԱՄՆ դոլար: Այդ գումարի հիմնական մասը ուղղված էր «Բաց դռներ բոլորի համար» ծրագրին, որի նպատակն է Հայաստանի երեխաներին և պատանիներին պաշտպանել խտրականությունից` մտավոր կամ ֆիզիկական հաշմանդամության պատճառով: 

Ընդհանուր առմամբ, 1997 թվականից ի վեր «Գաֆէսճեան ընտանիք» հիմնադրամի իբրև դրամաշնորհ հատկացրած 11 միլիոն ԱՄՆ դոլարից ավելի քան 1 միլիոն ԱՄՆ դոլարն ուղղված է եղել Հայաստանի երեխաներին օժանդակող ծրագրերին: 

Պարոն Ջերարդ Գաֆէսճեանի Հայաստանում ունեցած ներդրումների շարքում առանձնանում է նաև Գաֆէսճեան արվեստի կենտրոնը: 

Գաֆէսճեան արվեստի կենտրոնի առաքելությունն է ժամանակակից արվեստի լավագույն նմուշները բերել Հայաստան և աշխարհին ներկայացնել հայկական մշակույթի լավագույնը: Ոգեշնչվելով իր հիմնադրի` Ջերարդ Գաֆէսճեանի տեսլականով, Կենտրոնն առաջարկում է բազմազան ցուցահանդեսներ, որոնք պատկանում են Ջերարդ Գաֆէսճեանի ժամանակակից արվեստի լայնածավալ հավաքածուին: 2009 թվականի նոյեմբերին տեղի ունեցած բացումից առ այսօր Գաֆէսճեան արվեստի կենտրոնը, հավատարիմ իր առաքելությանը, ցուցադրում է ժամանակակից արվեստի յուրօրինակ գործեր, կազմակերպում դասախոսություններ, ֆիլմերի ցուցադրություններ, համերգաշարեր և կրթական ծրագրեր: