Գաֆէսճեան արվեստի կենտրոնը ներկայացնում է նոր քանդակ Ջերարդ Լ. Գաֆէսճեան հավաքածուից

Գաֆէսճեան արվեստի կենտրոնի (ԳԱԿ) բացօթյա «Սասունցի Դավիթե պարտեզի հարթակում տեղադրվել է նոր քանդակ` կորեացի արվեստագետ Ջի Յոնգ Հոյի հեղինակած «Առյուծ 2» (2008թ.) աշխատանքը:

Այս քանդակն ընդլայնում է Գաֆէսճեան քանդակների պարտեզում և Գաֆէսճեան արվեստի կենտրոնում ցուցադրված մոնումենտալ քանդակների տպավորիչ ընտրանին: Այստեղ արդեն իսկ ներկայացված են համաշխարհային համբավ ունեցող այնպիսի արվեստագետներ, ինչպիսիք են Ֆերնանդո Բոտերոն, Ժաումե Պլենզան, Բարրի Ֆլանագանը, Լին Չեդվիքը և Դեյվիդ Բրոյեր-Վեյլը:

Կորեացի արվեստագետ Ջի Յոնգ Հոն, համակցելով տարբեր անվադողեր, ստեղծում է կենդանիների արտասովոր քանդակներ: «Առյուծ 2» քանդակում նա օգտագործել է չժանգոտվող պողպատից հիմք՝ արտահայտելու չորսոտանի կենդանու դինամիկ կերպարը: Առյուծի վերջույթները մշակված են մոտոցիկլետի անվադողերի կտորներից, իսկ «մորթին»՝ շրջված անվադողերից: Անվադողն այն նյութն է, որով արվեստագետը լավագույնս արտահայտում է իր ստեղծագործական մտքերը: Սև անվադողերը հիշեցնում են արդյունաբերության և վերջինիս առաջացրած վտանգների մասին՝ թափոններ և շրջակա միջավայրի աղտոտում: Ջի Յոնգ Հոն հիմնականում ստեղծում է մուտանտ կենդանիների քանդակներ՝ իր աշխատանքներում շեշտադրելով արհեստածին գործոնների հետևանքով առաջացած ձևախեղումը: Ջի Յոնգ Հոյի աշխատանքներն արտաքնապես սարսափազդու են և ուժեղ, թեև իրականում նրանք փխրուն և անկայուն են:
Ջի Յոնգ Հոնի աշխատանքն ինքնին շրջակա միջավայրի ոչնչացման սպառնանքի ուղերձ է, մարդու կողմից՝ իրեն իսկ վտանգելու խորհրդանիշ:

Տեսադարան

Քանդակների տեղադրման լուսանկարները և տեսանյութերը
Իմանալ ավելին

ԱՅԼ ՆՈՐՈՒԹՅՈՒՆՆԵՐ

ԳԱԿ շարունակական անդամներին նվիրված երեկո

18 մյս 2026

ԳԱԿ շարունակական անդամներին նվիրված երեկո

Թանգարանների միջազգային օրը ևս մեկ հնարավորություն է արժևորելու թանգարանների դերը և շնորհակալություն հայտնելու այն մարդկանց, ովքեր մեր կողքին են։ Այս տարի Թանգարանների միջազգային օրը նշանավորվեց Գաֆէսճեան արվեստի կենտրոնի (ԳԱԿ) շարունակական անդամների համար նախատեսված հատուկ միջոցառմամբ, որը տեղի ունեցավ վերջերս վերաբացված «Խանջյան» սրահում։